رواية وللنصيب رأي ٱخر بقلم الكاتبة المبدعة لوليتا

مش صح بس والله العظيم ما كنتش فى وعيى.
نهى كانت باصه فى الأرض من أول ما خرجت من أوضه الطوارئ لغاية ما خلص كلامه وهى مارفعتش عنيها من الارض وفضلت ساكته ما ردتش عليه.
وهو متغاظ ومتجنن من سكوتها ده وحاسس انه عايز يهزها ويعرف هى سمعاه ولا لأ و الاهم من كده عايز يشوف نظره عنيها عايز يعرف هى بتفكر فى ايه وناويه على إيه وائل بيتكلم تانى نهى ارجوكى ردى عليا انا مش هفضل اتكلم كده وانتى ساكته بصيلى ردى عليا..
نهى فضلت لحظات ساكته وباصه فى الارض ومره واحده رفعت رأسها ليه وعنيها قصاد عنيه بتحدى وقوه بس فى نفس الوقت بتلمع من الدموع اللى حبساها انها تنزل متهيألى ان مهمتى هنا خلصت و انتهت عن إذنك.
نهى سابته و يادوب مشيت خطوتين لقته قصادها و وقفها عن انها تمشى نهى ارجوكى بلاش تمشى انا مستعد اعمل اى حاجه انتى عايزاها مستعد اعتذرلك قدام الموظفين و ده اصلا حقك بس بلاش إللى انتى بتفكرى فيه وإلى انتى عايزه تعمليه..
محمد كان راجع من الإستقبال بعد ما خلص إجراءات دفع مصاريف المستشفى وشاف وائل وهو بيكلم نهى بس محبش يتدخل عشان ما يبقاش هو و وائل عليها كفايه إللى عمله معاها الصبح بس هو سامع وائل وهو بيعتذر لها.
وائل وهو بيحاول يقنع نهى انها ما تمشيش لأنه حس من تصرفها انها فعلا هتعمل كده و مره واحده نهى اڼفجرت فيه وقالت بصوت عالى والدموع نزلت منها ڠصب عنها انت عايز منى ايه تانى ما كفايه بقى انت بتشغل الناس عندك عشان تهينهم وتجرحهم سواء انت ولا صاحبك إللى هناك ده!!
وائل اټصدم من كلمتها ليه و مقدرش يستوعب كلمه صاحبك غير لما لف وراه لقى محمد واقف على جنب لحظات ومحمد حط وشه فى الأرض وكأنه متهم فعرف ان محمد عمل معاها حاجه بس هو ما يعرفهاش.
وائل بص تانى لنهى وهى بتكمل كلامها بس المره دى ليهم هما الاتنين انت وهو بتعملوا فيا كده ليه ! انا عملت فيكوا ايه استاهل عليه كل الإهانة دى! نهى بصت لوائل من فوق لتحت بإحتقار وهو لاحظ ده بس مقدرش يتكلم ولا يرد عليها وهى بتكمل كلامها انت ما تستاهلش واحده زيى تشتغل معاك
نهى سابته ومشيت وهى عماله ټعيط وهو واقف لحظات مذهول من كل كلمه هى قالتها وبص وراه لقاها مشيت و محمد لسه واقف مكانه متحركش راحله الاول قبل ما يروح وراها وفجأه ضربه بالبوكس ف وشه وهو بيقوله بغل و حقد و عنيه بيطلع منها شرار وڠضب انت حسابك معايا بعدين.
وائل سابه وطلع يجرى وراها. و محمد حط إيده على خده إللى وائل ضربه فيها وحس كأن فكه اتكسر ااه يا بن اللذينه ربنا يسترها ويلحقها قبل ما يكسر كل حته فيا ده إيده مرزبه. محمد بإبتسامه خفيفه بس والله شكل الموضوع فى إن ولازم اعرفها حتى لو رسيت على خڼاقه مسيري اعرف موضوعها ايه اه يا فكى منك لله يا شيخ
نهى خرجت جرى من المستشفى وهى مڼهاره من العياط ومش عارفه تعمل إيه ولا تروح إزاى و فجأه لقت إللى بيشدها من دراعها وبيقولها حاسبى!!
لفت ليه كان وائل.. اول ما لقته هو رد عليها بسرعة قبل ما تعمل اي حاجه او تتهور حاسبى من العربيات.
نهى شدت دراعها منه وقالت بعصبيه سيبنى فى حالى بقى مش عايزه اشوف وشك تانى.
وائل بإرتباك استهدى بالله واسمعينى الاول ولو كلامى معجبكيش اعملى إللى يريحك ويرضيكى اللى انتى عايزه تعمليه هسيبك تعمليه بس اسمعينى الأول
نهى ما كنتش عارفه تعمل إيه. خاڤت تتهور او الأمور تخرج عن سيطرتها لأنها خاېفه من بكره ومحتاره تقبل اعتذاره ولا تسيب الشغل وخاڤت اكتر انها تضيع فرصه شغل كويسه وهى فعلا محتاجه للشغل فقررت انها تسمعه الاول وبعدين تاخد قرار نهائي.
نهى بتمسح دموعها اتفضل عايز تقول ايه تانى!
وائل حس ان دى فرصته الاخيره يا يقنعها انها تفضل معاه يا هتسيبه وللأبد ويا عالم هيشوفها تانى ولا لأ فأخذ نفس جامد انا مش عايزك تسيبى شغلك سكت شويه وكأنه بيفكر فى حيله كويسه يمنعها بيها من غير هى ما تلاحظ انه متمسك بيها.. و كمل كلامه على الأقل ما تسبيهوش بالشكل ده انا غلطت فيكى ف على الأقل حقك يترد قصاد الناس و استنى شهر او شهرين لو فكرتى تسيبى الشغل تانى..
كان بيتكلم وعينه فى عنيها وكأنه بيترجاها ده احساسه هو بس هى مش شايفه ده شايفه واحد بيحاول يصلح غلطه إحساس بالذنب مش أكتر.
نهى سكتت وبصت بعيد عنه وهو كمل كلامه نهى انا عايز ارد إعتبارك قدام الناس فأرجوكى.. نهى اول ما قالها كلمه ارجوكى بصت فى عنيه ولقت نظره غريبه هى مش عارفه تفسرها بس حست انه بيترجاها مش مجرد كلمه لأ ده فعلا يقصدها.. وائل بيكمل كلامه ارجوكى ادينى فرصه تانيه وانا اوعدك مش هسمح لمخلوق فى الدنيا دى كلها يهينك او يجرحك او يمس شعره واحده منك..
عينه كانت بتلمع وهو بيقولها كده.
نهى لما حست ان كلامه نابع من جواه وأن ده مش مجرد كلام وخلاص غمضت عنيها و أخذت نفس جامد وخرجته بالراحة وفتحت عنيها وبصت فى عنيه انا موافقه اديك فرصه اخيره بس ده ما يمنعش انك هتعتذرلى قدام موظفينك..
وائل فرح أوى و إبتسم وحس انه قدر يتنفس من تانى حالآ تعالى نرجع الشركة دلوقتى واعتذرلك قدامهم..
نهى إبتسمت وهزت دماغها بالموافقة هى حست ان دى فرصتها انها تسترد كرامتها وفى نفس الوقت تحتفظ بشغلها لأنه هو إللى متمسك بيها و كمان كلامه منطقى.
وائل ونهى رجعوا على المستشفى لقوا محمد واقف مع أهل البنت وشرحلهم الوضع إيه و قال لهم انها فى اجازه لمده أسبوع و كل مصاريفها على حساب الشركه محمد استأذن منهم لما لقى وائل ونهى دخلوا المستشفى مع بعض وراحلهم.
نهى لاحظت ان خده وارم فإستغربت خير يا باشمهندس! خدك ماله!
محمد بص لصاحبه الأول ورجع بصلها تانى ومسك خده إللى وارم شكلك كده دعيتى عليا وذنبك ربنا خلصه منى.
نهى حاولت تكتم ضحكتها بس وائل ومحمد لاحظوها ووائل بص لمحمد بتوعد احنا لينا كلام تانى مع بعض بس دلوقتى انت مديون ليها بإعتذار.
نهى إتفاجئت باللى قاله وائل ومحمد إبتسم لأنه فعلا كان هيعمل كده من غير ما هو يطلب منه ف محمد قالها بإبتسامه انا فعلا مديونلك بإعتذار فياريت تقبلى إعتذارى واوعدك مش هرخم ولا هغلس عليكى تانى.
نهى إبتسمت بهدوء انا قبلت اعتذارك هنا يا بشمهندس بس وبصت لوائل وكملت كلامها الإعتذار التانى مش هقبله هنا.
وائل بصلها وابتسم بهدوء وانا لسه عند وعدى ليكى.. وائل بيكمل كلامه احنا لازم نروح الشركه دلوقتى وجه كلامه لمحمد روح نادى على البنت عشان هنروح الشركه مع بعض دلوقتى.
محمد نده على البنت إللى كانت معاهم فى عربية الإسعاف وكلهم ركبوا مع وائل محمد جنبه ونهى والبنت قاعدين ورا.
وائل أول ما دخل الشركه طلب من الإستقبال انه يجمع كل موظفين الشركه فى غرفة الإجتماعات بما فيهم الاستقبال والأمن.
نهى ومحمد و وائل قعدوا فى مكتب وائل ومنتظرين دخول الموظفين فى غرفه الإجتماعات محمد قاعد قصاد نهى وبيسألها بصراحة كده انا عايز افهم!! انتى عرفتى إزاى تعمليلها انعاش!! انا كده هتجنن.
نهى اول ما محمد سألها كده ضحكت جامد لدرجه انها معرفتش تكتم ضحكتها المره دى و وائل كان بعيد عنهم شويه عشان بيحضر الكلمه إللى هيقولها قدام الموظفين بس عينه عليهمو اول ما نهى ضحكت بصلها بغيظ وراح ليهم وهو متغاظ منها ومن صاحبه طيب ما تضحكونى معاكو ولا مليش نصيب غير فى الزعل وبس!
نهى بصتله ومحمد كمان إلى استغرب من نظرة وائل ليهم وكده هو اتاكد من نظرته ان نهى مش زى اى واحده تانيه عند صاحبه دى مميزه وبدأت تشغل تفكيره وده صډمه اكتر لان الموضوع كله حصل فى اقل من ٢٤ ساعة بس إبتسم وحب يشوف ايه إللى ممكن يحصل.
نهى بصتله وردت سورى يا باشمهندس بس مقدرتش امسك نفسى من طريقة سؤال باشمهندس محمد ليا.
وائل بص لمحمد بغيظ اكتر ومحمد بسرعة اتكلم انا بس كنت عايز اعرف هى عرفت الحاجات دى ازاى مش أكتر.
وائل سكت بس كان عينيه كلها غيظ وغل من محمد واخد نفس طويل حاول يجمع نفسه عشان ما يتفضحش قدامهم وسألها انا كمان عايز اعرف عرفتى تعملى كده ازاى
نهى إبتسمت بهدوء انا خدت كورس لمده ٦ شهور فى اسكندريه عشان اكون مضيفه جويه
وائل ومحمد عنيهم وسعت من الذهول ومحمد مضيفه جويه! انتى! طب ازاى!
نهى ردت بإبتسامه عادى جدا انا مؤهل عالى أخدت الكورس عشان اشتغل مضيفه واسيب المحاماه..
وائل قطع كلامها بغيظ أكتر اه!! وحضرتك كنتى هتقلعى الحجاب عشان الضيافه! ولا انتى اصلا ماكنتيش محجبه!
محمد تنح من سؤال صاحبه لانه كده خلااااص صاحبه وقع من غير ما يحس وابتسم إبتسامه خفيفه محدش لاحظها بس من جواه حلف انه لازم يخليه يعترفله بكل حاجه.
نهى ردت عليه بغيظ واضح وظاهر على فكره حضرتك بتحكم عليا غلط ومن غير ما تسمع الحكايه لاخرها فلو حضرتك عايز تحكم يإما تستنى للاخر يإما بلاش منها خالص.
وائل اتغاظ أكتر لان كلامها صح و أتضايق من نفسه لأنه عمل زى محمد حكم عليها من غير ما يسمعها انا اسف إتفضلى كملى.
نهى اتنهدت وبعدين كملت كلامها انا خدت الكورس وانا محجبه ومكنتش هقلع الحجاب لو كنت هشتغل فى الضيافه لان فى شركات طيران لازم تكون المضيفه محجبه ولو هياخدوها مش محجبه فلازم تلبس الحجاب على الطياره فبالتالى مكنتش محتاجه انى اقلع الحجاب لانهم عايزين مضيفات اصلا محجبات نهى بصت لوائل انا كده رديت على حضرتك بخصوص موضوع الحجاب نهى بتكمل كلامها ليهم اما بالنسبه لموضوع الإسعافات الأولية فكان من ضمن الدراسه الإسعافات الأولية والانعاش سواء الرضع او الأطفال أو الكبار وحالات الولاده على الطياره و درست كمان كيفيه التعامل مع الإرهابيين على الطياره لأن أوقات مش بيكون فى امن على الطياره فالمضيفه هى إللى بتتعامل معاهم ده كل الموضوع.
وائل فرح من جواه لما عرف انها ما كنتش هتقلع الحجاب عشان الشغل و كمان كان مبسوط ان واحده زيها عندها القدره انها تشتغل فى كذا مجال وتقدر تتصرف من